Hereu diz que la producción d'aceru pue liderala ArcelorMittal "o quien seya"

"Nun quiero falar sobro especulaciones, quiero falar sobro proyectos, lo qu'afito ye l'interés estratéxicu pola actividá"

El ministru d'Industria, Enerxía y Turismu, Jordi Hereu, destacó esti vienres l'interés estratéxicu d'España en relación a la producción d'aceru, daqué que, según remarcó, "pue liderar ArcelorMittal o pue liderar quien seya", anque nun quixo avanzar otres posibles alternatives.

El ministru, que güei visitó les instalaciones de Fertiberia pa conocer el proyectu de descarbonización de la empresa acompañáu del presidente del Principáu, Adrián Barbón, dio asina respuesta a la entruga de cómo van les negociaciones con ArcelorMittal pa rematar el so procesu de descarbonización pal qu'esisten 450 millones d'euros de subvención.

"Nun quiero falar sobro especulaciones, quiero falar sobro proyectos, lo qu'afito ye l'interés estratéxicu pola actividá y eso pue lideralo Arcelor o quien seya", declaró Hereu, que conseñó que, seya como fuera, el ciclu integral de l'acería va ser n'Asturies.